13 “Nakita ko na ug nadungog kanang tanan ninyong gisulti, ug nakasabot ako niana. ² Nahibalo ako sa inyong nahibaloan; wala kamo makabintaha kanako. ³ Apan buot ko nga makigsulti sa Dios nga Makagagahom ug makighusay kaniya bahin sa akong kaso. ⁴ Kay ginatinguhaan ninyo nga tambalan ako pinaagi sa mga bakak. Nahisama kamong tanan sa doktor nga walay pulos. ⁵ Mas maayo pag magpakahilom na lang kamo. Mao kanay labing maayo ninyong buhaton.

⁶ “Palihog, paminawa ninyo ang akong reklamo; hatagi ninyog pagtagad ang akong mga rason. ⁷ Depensahan ba ninyo ang Dios pinaagi sa inyong pagpamakak ug pagpanglimbong? ⁸ Paboran ba ninyo siya? Kamo bay mobarog alang kaniya sa korte? ⁹ Kon susihon kamo sa Dios, may maayo kaha siyang makita diha kaninyo? Limbongan ba ninyo siya sama sa paglimbong ninyo sa mga tawo? ¹⁰ Sigurado gayod nga badlongon kamo sa Dios bisag gipaboran pa ninyo siya. ¹¹ Wala ba kamo mahadlok sa iyang gahom? ¹² Ang inyong mga panultihon walay pulos sama sa abo; ang inyong mga rason sama kahuyang sa kolon.

¹³ “Paghilom kamo, ug pasultiha ninyo ako. Pasagdi ug unsay mahitabo kanako. ¹⁴ Andam ako nga mosugal sa akong kinabuhi. ¹⁵ Kon patyon ako sa Dios, wala na akoy paglaom.^[a] Apan depensahan ko gihapon ang akong kaugalingon sa iyang atubangan. ¹⁶ Basin pinaagi niini maluwas ako, kay ang tawo nga dili diosnon dili gayod makaduol sa iyang presensya.

¹⁷ “Paminawag maayo ang akong isulti. ¹⁸ Karon giandam ko na ang akong kaso, ug nasayod ako nga ideklarar ako nga inosente. ¹⁹ Kinsay makaakusar kanako? Kon aduna man, magpakahilom na ako ug mamatay.

²⁰ “O Dios, buhata kining duha ka butang alang kanako ug dili ako motago gikan kanimo: ²¹ undangi na ang pagpaantos kanako, ug ayaw na akog hadloka sa imong makahahadlok nga ginahimo kanako. ²² Karon, tawga ako ug tubagon ko ikaw, o ako nga mosulti kanimo ug tubaga ako. ²³ Sultihi ako kon unsay sayop nga akong nahimo. Ipakita kanako ang akong mga kalapasan ug kasal-anan. ²⁴ Nganong naglikay ka man kanako, ug giisip mo ako nga imong kaaway? ²⁵ Nganong gihadlok ug gigukod mo ako? Sama lang ako sa ugang dagami o sa dahon nga gipalid sa hangin. ²⁶ Nagsulat ka ug sakit nga mga akusasyon batok kanako, ug gipabayad mo ako sa mga sala nga nahimo ko niadtong batan-on pa ako. ²⁷ Daw sa gikadenahan mo ang akong mga tiil. Gibantayan mo ang akong mga lakang, ug gisundan mo ang akong mga tunob. ²⁸ Busa nagakadaot ako sama sa gabok nga butang o sa bisti nga gikutkot sa gagmayng mananap.”